విరించి ll    సంచిత గీతం  ll
--------------------------------------------

నీకు తెలియకుండానే నన్ను బాధ పెడతావ్
బాధ పడకూడదనే అనుకుంటాను నేను

ఏమీ తెలియని పసివాణ్ణని నన్నెగతాళి  చేస్తావ్
ఎందుకనో....పసివాణ్ణవుతాన్నేను

నేను గమనించలేదనుకుని
అపహాస్యాన్ని నావెనుక రహస్యంగా ఇంకొకరితో పంచుకుంటావు
గమనించనట్టే ఉండిపోతాన్నేను.

నాతో కలిసి పంచుకున్న నవ్వులన్నీ
నా వెనుక నన్ను చూసి నవ్వినపుడు కూడా
ఇదంతా స్నేహమేననుకుంటాన్నేను.

నీతో చెబుదామనుకుని ఆపేసిన మాటల్లో
నేను మాత్రమే దాగుండిపోతాసు
నీతో చెప్పి పంచుకున్న ఆ కొన్ని నవ్వుల్లో
నీవే సర్వమై వుండిపోతుంటావు.

కానీ చివరిలో
మాటకారిని కానందుకేమో...
నీముందొక స్వార్థపరుడిలా మిగిలిపోతాన్నేను

కలతల్లేని నిద్ర కోసం
అర్ధరాత్రి కొన్ని క్షణాల్ని కన్నీటితో తడుపుతున్నపుడు
నీవన్నదే నిజమనిపిస్తుంది
నేను మాటకారిని కాను
స్వార్థపరుడనని

23/2/17