ll అర్ధాంతరంగా ముగిసే కవిత ll విరించి
..................................
నీవు నిదురించిన చోటే
నీ ఉదయాలు మేలుకోవచ్చు.

నీ నిర్హేతుక సాయంత్రాలు
ఏ నిదురలో ముగుస్తాయో..

నీ పాక్షిక నిదురలోకి
నీ ఉదయాలు కలలై రావొచ్చు

నీ శాశ్వత నిదురలో
నీ జీవితం ఒక కలగా మిగలొచ్చు.

ఇలా తీక్షణంగా చెప్పే కవితా పంక్తులు
నీకు యమా బోర్ కొట్టీయొచ్చు.

ఉరుకులు పరుగుల జీవితంలో
తీరిగ్గా ఆలోచించే ఓపిక నీకున్నా..
టచ్ స్క్రీన్ మీద స్కేటింగాడే
నీ చేతుల కుండకపోవచ్చు.
పద కాస్త అలవోకగా కవితలోకి
కారులో దూసుకు పోదాం.

నీ కారు పయ్యలు ముందుకి ఉరుకుతుంటాయి
రోడ్దు మధ్యలోని తెల్లటి గీతలు వెనక్కు కదులుతుంటాయి.
జీవితం అతి వేగం కదా...
కుడికాలు కింది యాక్సిలరేటర్ లో
పంచ ప్రాణాలు ఎగిరి దూకుతుంటాయి.

సిగ్నల్ దగ్గర అమానుషంగా మెరిసే రెడ్ లైట్
వెంటనే ఆరి పోవాలనుంటుంది.
ఛా...వంద సెకండ్లు ఆపాడా ఈ దరిద్రుడు
అని కోపంగా అరవాలనుంటుంది.
గ్రీన్ లైట్ త్వరగా పడిపోవాలనుంటుంది.
అడ్డొచ్చిన ప్రతి వాన్ని ఎగిరి తన్నాలని ఉంటుంది.
ఏ ఆర్ రహ్మాన్ ఫాస్ట్ బీట్ పాట కారులో ఊపందుకుంటుంది.
బయటి జనాలకు ఆ గజ్జల శబ్దం వూఫర్ లోంచే ఊపేస్తుంటుంది.
నీ ఒంట్లో నరాలు ఉప్పొంగుతుంటాయి.
రక్తాలు వేడెక్కే కొద్దీ...కిక్కు ఎక్కేకొద్దీ
నీ కారు పంచ కళ్యాణిలా దూసుకు పోతుంటుంది.
చెట్లు వెనక్కి ఉరుకుతుంటాయి.
మనుషులు వెనక్కి ఉరుకుతుంటారు.
వంద... నూటా ఇరవై కి.మీ. వేగం..జస్ట్ అంతే కదా.
వ్యూ మిర్రర్ లో ప్రకృతి అందాలు పారిపోతుంటాయి.
ఎంతకు ఐపోని ఈ సుత్తి కవితా పంక్తులని
త్వరత్వరగా చదివేయాలని ఉంటుంది.
చూపుడు వేలుతో బర్రున కిందకి స్క్రోల్ చేయాలనుంటుంది.
ఎంత కష్టపడి రాస్తే ఏం..
ఒక్క క్షణంలో లైక్ కొట్టి
'వండర్ ఫుల్' అని ఓ కామెంట్ పడేయాలనుంటుంది.

కానీ క్షణంలో అంతా మారిపోతుంది.
పెద్దగా బ్రేకు పడిన శబ్దం తరువాత జరిగే విధ్వంసం
నీ చెవులకి నిశ్శబ్దంలా ఉంటుంది.
పాత క్యాసెట్ అరిగి పోయినట్టు
అంతా గందరగోళంగా ఉంటుంది.
చివరి క్షణాలు శ్వాసిస్తున్నట్లు
నీ ఆలోచనంతా సన్నగా అవుతుంటుంది.
ఈ కవితను మెల్లగా చదవటం మొదలవుతుంది.
చూపుడు వేలుకింది స్కేటింగ్ షూ స్ చటుక్కున ఆగిపోతాయి.
రక్తం ఒక వైపుకు చిమ్ముతుంది.
శరీరం ఇంకో వైపుకు ఒరుగుతుంది.
ఈగల్లాగా జనాలు చుట్టూ మూగుతారు.
అర్జంటుగా ఉరికి పోయే కార్లు కూడా
పక్కకు ఆగి అడుగుతుంటాయి
చనిపోయాడా లేదా అని.
లైకూ కామెంటూ పడని కవితలాగా
ముఖం కమిలిన ప్రతీవాడూ..
పెదవి విరుస్తూ..ఒక కామెంటు పెడతాడు జీవితానికి
'అయ్యో..పాపం' అని.
 RIP అనే కామెంటు కోసం
ఇంకెవడో ఒకడు సెల్ఫీతో అప్ లోడ్ చేసేసుకుంటాడు.

ఆ అందవిహీన భయంకర రక్తపాత దృష్యాన్ని
అందంగా చూపే ప్రయత్నంలో..
రోడ్డు పక్కని ఓ పువ్వు విఫలయత్నం చేస్తుంటుంది.
ఆ పూవు వంక చూసి
నీ ఆఖరి చూపులు నిట్టూరుస్తాయి.
అపుడు నీ జీవితం..
అర్ధాంతరంగా ముగిసిన అద్భుత కవితలాగా కనిపిస్తుంటుంది.
ఎన్నో లైకులతో కామెంట్ లతో ఈ కవిత కూడా ముగుస్తుంది.

8/7/15

అ కు అ వత్తిస్తే...పార్ట్ 3
......................................

* సినిమాల్లో పెద్ద హీరో....రాజకీయాల్లో పేద్ద కమెడియన్

* నేను పిల్లి లాంటోన్ని. అది గడ్డం చిన్నగా పెంచుద్ది, నేను పెద్దగా పెంచుతా. మిగతా అంతా సేమ్ టూ సేమ్.

* అవతలవాడికి ఏమీ అర్థం కాకుండా గంటసేపు మాట్లాడటం ఎలా?

* పొలిటికల్ లీడర్ ల ప్రభావం జనాల మీద ఎంతుందో తెలియదు కానీ, పొలిటికల్ కమేడియన్ ల ప్రభావం చాలానే ఉంది.

* బాగానే బట్టీ పట్టాను. కానీ ఈసారి కూడా రాసిచ్చిన స్క్రిప్ట్ పేపర్లు అటూ ఇటూ అయ్యాయి. లేకుంటేనా....

* నేను చెప్పనందుకే ప్రధాన మంత్రి ఏ ఆక్షనూ తీసుకోలేదు. ఇపుడు చెప్పా కదా...ఇపుడు తీసుకుంటాడు.

* చూడమ్మా సతీ సావిత్రీ..నీవేదైనా అడుగు...ఆ ఒక్క ప్రశ్న తక్క.

* నన్ను ఆంధ్రోడు అనొద్దు...పలీజ్. నేను విశ్వ మానవుణ్ణి

* క్రిమినల్స్ ని వెనుకేసుకొస్తే సివిల్ వార్ రాదు?.

* నేను ప్రశ్నిస్తా అన్నాను.మీరు నన్ను ప్రశ్నిస్తే ఎలా.

* నీవుఎవరైతే నాకేంటి . నేను బొమ్మా..ఒకరి చేతిలో కీలు బొమ్మ ని.aaahh

* కంచు మ్రోగినట్టు పంచు మ్రోగునా.

విరించి    ll  ఎవరు కవి  ll
........................................
నీ బాధ నానుండి ప్రవహించాలని
ఈ అక్షర గునపాలతో
నాలో నేనే ఒక వాగు తవ్వుకుంటాను.

మనుషుల జాడే కానరాని
నీ ఎడారిలో
నీ సముద్రంలో
నీ మైదానంలో
నేనూ ఒక సాటి మనిషిలా నిలబడతాను.

ఎంత పొంగినా కట్టలు తెంపలేని నదిలా
జాగ్రత్త పడుతూ  నీవు
ఎంత తవ్వినా నీరు పడని
బోరు బావిలా నేను
ఒకే సమరాంగనలో
రెండు పేలని తూ టాలమవుతాం.

ఏం..అనామక స్వప్నంలా వచ్చి పోయే
కవితా పంక్తుల్లోకైనా ఒక అక్షరమై ఒస్తే
నీ గంటేంపోతుంది?.

ఇన్ని వేల మాటలు నీ కోసం రాసీ రాసీ
చివరికి నీ అనుపానులు కూడా వాటిల్లో
నేను కనుగోలేనపుడు
నన్ను నాకు చూపించే ఈ కవితాద్దాలను
నెత్తికేసి కొట్టుకోనా..?

నీ ప్రాంగణంలో నిలబడినంతనే
పుంఖాను పుంఖాలుగా
కవిత్వం వచ్చేస్తుందనే నా వెర్రి భ్రమలో
నేను తలమునకలైనపుడు
విశ్వానికుండే బాధనంతా
భుజానికెత్తుకుని
శిలువేసిన యేసు ప్రభువులా
నువు నడుస్తుంటావు చూడు..
అపుడనుకుంటాను
కాళ్ళీడుస్తూ నీవు రాసే కవిత్వం ముందు
ఖాళీ కాగితాల మీది ఈ కవిత్వం ఎంతటిదని.

ఓ కష్ట జీవీ...
నీవే అసలు సిసలు కవివి.

5/7/15

ఎఫ్.బీ. లో మొదటిసారి నిన్నొక సోదరుడిని బ్లాక్ చేశాను. ఇది నా స్వభావానికి పూర్తిగా భిన్నం. పోట్లటకైనా 'సై' అంటాం కానీ, పూర్తిగా బ్లాక్ చేసేసేయటం a little bit  డిఫెరెంట్ గా అనిపించింది.  నిన్న ఈ సదరు సోదరుడు నా వాల్ మీదకొచ్చి తిట్లదండకం మొదలెట్టాడు. ఏంటో మరి ఏం మెంటల్ డిసార్డరో తెలియదు. భలే కామిడీ గా ఉండింది కాసేపు. స్మితా సబర్వాల్ గారిని ఇష్టం వచ్చినట్లు అన్నారని నేను రాసిన ఆర్టికిల్ కింద, నేను భారత దేశాన్ని అవమానిస్తున్నానట. Mind blowing...Gingiralu tiriging kadaa.. జేపీ గారు ఓటుకు నోటు విషయం లో చెప్పిన అభిప్రాయాన్ని షేర్ చేసినందుకు, దేడ్ దిమాక్ సాలేగాడు చెప్పిన విషయాన్ని దేడ్ దిమాక్ సాలేగాడిలా షేర్ చేశానట. సరే మరి, మనకంత తెలివేడిస్తే బాగానే ఉండేదికదా. ఏ ఐయేఎస్సో ఐపీఎస్సో ఐపోతుండె. అవి లేకనే గద గిట్ల ఉన్నం. అదే ఇషయం జెప్పిన. తిట్టడమే సోదరుడి ప్రధాన ఉద్దేశం కాబట్టి 'ల' కారాలతో తిట్లందుకున్నాడు. జీవితంలో కామెడీ మిస్ అయితుందనుకున్నపుడు ఇలాంటి వాల్లు మనకు మాంచి ఎంటర్ టైన్మెంట్. కాకపోతే మన సోదరుడు ఏ సినిమా హీరోకి తగ్గనంత అందగాడు. 'ఫేస్ ఈస్ ఇండెక్స్ ఆఫ్ ద మైండ్' తప్పని మరో సారి రుజువు చేసేంత బలంగా ఉన్నాయ్ ఆ అందమూ..ఆ మాటలూ. సరే మరీ ఇంత భీభత్సమైన కామెడీ ఎందుకులే అని ఇంకో చిరకాల మిత్రుడు చెప్పటం వలన బ్లాక్ చేసి పడేశాను. సరే.

ఇక అప్పట్లో భీభత్సమైన ప్రాంతీయాభిమానం చూపే ఫనాటిక్ మిత్రున్ని, అన్ ఫ్రెండ్ చేశాను. కొద్ది రోజులయ్యాక ఫ్రెండ్ చేద్దామనుకునేసరికి ఆయనే నన్ను బ్లాక్ చేసి పడేశాడు, అన్ ఫ్రెండు చేశానన్న అక్కసుతో. ఆ తరువాత యథావిధిగా నన్ను తిడుతూ ఏకంగా పైత్య రస కవితలు రాసేసుకున్నాడట. కామెడీ ఇషయాలకోసం వెతుక్కునే నా స్నేహితులు చూసి తెగ నవ్వుతూ  చెప్పేవారు. ఏం శాల్తీలు రా భయ్ అని.

మనం నవ్వుకోడానికి మన హాపీ అరవిందుడిలాంటి సహృదయ మితృలే  గాక అపుడపుడూ సీరియస్ గా కామిడీ చేసే ఇలాటి క్రేజీ గురవిందలు కూడా పనికొస్తుంటారని ఇందు మూలముగా చెప్పొచ్చాను.

ll  శవ యాత్ర  ll virinchi
................................................
మరణించాకే నీ యాత్ర మొదలవుతుంది.
శవాలు మోసే నిర్జీవ యాత్ర మొదలవుతుంది.
శవాలప్పుడు లేచి కూచుంటాయి.
బంధు మిత్ర వర్గం తోపాటు
నిన్ను చూసి జై కొడతాయి.
పూలు వేస్తాయి
దండలు కడతాయి..
పుష్ప గుచ్చాలు సమర్పించుకుంటాయి
కండువాలు మెడకు చుడుతాయి.
నుదుటిన తిలకం దిద్దుతాయి
ఇక తమ శవాల రారాజువి నీవేనని ప్రకటించుకుంటాయి.
నీ బంధువులు అమాయకంగా ఈ శవాల్ని చూడలేరు.
నీ మిత్రులు పాపం కంట నీరు పెట్టుకుంటారు.

నీవిక ప్రసంగిస్తావు.
అరవ లేవని తెలిసిన ప్రతిసారీ
నీ అరుపులు ఆకాశంలో అరణ్యాలవుతాయి
నీలో ముసురుకొస్తున్న భయానికి
నీ అరుపొక అద్దమౌతుంది
మైకు మీద విషం కక్కుతావు
శవాల చెవుల్లో
అమృతాన్ని వొంపుతావు
అవి వినాలనుకున్నవే నీవు చెబుతావు
చచ్చాక చెప్పే మాటలే కదా..
అలవాటుగానే అవి చప్పట్లు కొడతాయి.
డ్రమ్స్ వాయిస్తాయి.
బాణా సంచా కాలుస్తాయి.
నీ శవం మౌనంగా పడుకుని ఉంటుంది.

బతికున్న మనుషులు బిత్తరిల్లి పోతారు
పులిని చూసినంతగా నీ శవాన్ని చూసి భయపడతారు.
ట్రాఫిక్ జాంలో నడిరోడ్డు మీద వాచీని పోగొట్టుకుంటారు
వెనుక ఆంబులెన్స్ లో ఓ తల్లి ప్రసవ వేదన పడుతుంది
బురదలో పందులు దొర్లుతుంటాయి
ముందున్న కారుని గుద్దిన సైకిల్ వాడు వొచ్చి
కారతన్ని బండబూతులు తిడుతుంటాడు.
చుంచెలుకలు కలుగుల్లోంచి రోడ్డుమీదికి వచ్చి పోతుంటాయి
కుక్కలు మొరుగుతుంటాయి.

నీ శవం బరువెక్కుతుంటది.
మోసే వాళ్ళు వొంగిపోతుంటారు.
దింపుడు కల్లం దగ్గర ఒకసారి దింపుతారు
నారాయణ మంత్రం చెవిలో చదివి
బిగ్గరగా పేరుతో అరుస్తారు.
నీ వంశం పేరు, నీ ఊరి పేరు
నీ పిల్లల పేర్లు   వారి భవిష్యత్తు
అంతా మళ్ళీ నీకోసారి గుర్తుచేస్తారు.
నీవు మేలుకోవాలని చుట్టూ చేరిన బంధువులు
ప్రార్థనలు  చేస్తుంటారు
చటుక్కున లేచి కూర్చుని నవ్వాలని కోరుకుంటారు.
కానీ నీవు శవంలా బతకడానికే నిర్ణయించుకుంటావు
నారాయణ మంత్రాన్నసలు పట్టించుకోవు.
దండలేసిన శవాల్ని ఏడుస్తున్న బంధువుల్నీ పోల్చి చూసుకుంటావేమో,
శవాల్ని కౌగిలించుకుంటావు.
చరిత్రలో కట్టెవై కాలిపోతావు.

2/7/15

ఈ వార్తలు ఇంతటితో పునః ప్రసారం.
...............................................
* ఈ వార్తల్లోని అంశాలు కేవలం కల్పితాలు. ఎవరినీ ఉద్దేశించినవి కావు.

* కల్పిత కథలతో జనాలకి బోర్ ఒచ్చిందట సారూ...అందుకే ఈ కల్పిత వార్తలతో కొత్త రకం ఎంటర్టైన్మెంట్.

* అబద్దం చెప్పినా అతికినట్టుండాల. న్యూస్ రీడర్ లాగా.

* వాక్ స్వాతంత్ర్యం మనుషులకేనా...న్యూస్ ఛానల్స్ కి ఉండకూడదా.

* ఇవ్వాల్టికి బాంబులా పేలే న్యూస్ ఏమీ లేవు. అప్పట్లో బాంబు పేలినప్పటి న్యూస్ ని మల్లీ వేయండి.

* మన వాల్లందరికీ చెప్పు టీటీ అని టైప్ చేసి స్పేస్ ఇచ్చి యెస్ అని కొట్టి, ఒకటి రెండు మూడు నాలుగుకి మెసేజ్ పంపమను...ఆ..యేదో చచ్చు ప్రశ్నలేవయ్యా..నీకవసరమా?.

* బ్రేకింగ్ న్యూస్....ఈ రోజు ఎలాంటి బ్రేకింగ్ న్యూస్లూ లేవు.

* స్టే ట్యూన్డ్ ...పార్టీ ఆఫీస్ బులిటెన్ మరి కాసేపట్లో.

* ఇపుడింకో బ్రేకింగ్ న్యూస్ కోసం బ్రేక్ తీసుకుందాం. స్టే విత్ అస్.

* అన్ని రాజకీయ పార్టీలకతీతంగా వార్తలు ఉండాలనే ఉద్దేశంతోటే...ఈ ఒక్క పార్టీ వార్తలనే ప్రసారం చేస్తున్నాం.

* పొద్దున్నుంచి ఒకే విషయాన్ని మార్చి మార్చి చెబుతున్నా నేను...ఓ మూడు విషయాల్ని మూడు నిమిషాల్లో చెప్పమంటే 'ఎలా చెబుతారండీ'  అని ఏడుస్తావేంటయ్యా?.

* ఇపుడు ఫిల్మ్ బ్రేకింగ్ న్యూస్.

* వెల్ కం టూ న్యూస్ హవర్ డిబేట్. నా పేరు నారద.

* టీవీని ఈడియట్  బాక్స్ అని ఎలా అంటారు. ఇపుడసలది బాక్స్ లాగే ఉండటం లేదు కదా. వాల్ పేపర్ లాగా ఉంటున్నపుడు మీరెలా దాన్ని బాక్స్ అంటారు?.

* పీడనాన్ని నిరోధించే హక్కు మీకున్నంత మాత్రాన..న్యూస్ ప్రసారం చేసే వాక్ స్వాతంత్ర్య హక్కుని కాదంటారా?.

* న్యూస్ కి బ్రీఫింగ్ ఉండదు..బ్రేకింగే.

* సర్ మీరీమధ్య సంచలన తిట్లు తిడుతున్నారు. న్యూస్ హవర్ డిబేట్ కిదే మా ఆహ్వానం.

* మా ఛానల్ లో మిగతా ఛానల్స్ లాగా బ్రేకింగ్  న్యూస్  ఉండవ్. అన్నీ షాకింగ్ న్యూసే.

* ఏదో జరగబోతోందని నిన్న బ్రేకింగ్ న్యూస్. ఏమీ జరగటం లేదని ఈ రోజు బ్రేకింగ్ న్యూస్.

* బ్రేకింగ్ న్యూస్...ముసలితనం వచ్చి నిదురలో సహజ మరణం పొందిన సామాన్యుడు.

అ కి అ వొత్తిస్తే...2
................................
* మల్లీ ఏం జేస్తవని అడుగుతౌ....శెప్పిన కదా...ఏంజేస్తం...ట్విట్టుతం.

* గుడ్డుమీద బొచ్చు పీకడమంటే ఏందో అనుకున్న...ట్వీటడం.

* పీకావులే నెట్టు మీద ట్వీటు

* ట్వీటు శతకం రాయలని  యోగిలా మారాడు.

* తెగేదాక లాగకూడదు. ఇదేమైనా తాళా?

* మండేలా చూపే నీదేలే...ఓ మిస్సయ్యా మిస్సయ్యా అయ్యా...నీ మైనస్సే చూశామయ్యా..

* ఆయన బ్రీఫాడు..నేను ట్విట్టాను.

* ప్రశ్నించడమంటే..ఏంటో అనుకోకండి. ట్విట్టర్ లో ట్విట్టడం.

* సంబంధం ఉందా లేదా అని కాదన్నయ్యా...ట్వుటానా లేదా అన్నది చూడాలి.

* తూ చ్..తొండి. ప్రశ్నిద్దామని ట్వీటితే...ఒక్క ట్వీటుకి ఇన్ని ప్రశ్నలా?.