విరించి ll కవితా అద్దం ll
..............................
ఓ కవీ..
జీవితంలోని అనేక రంగులు
శబ్దాల్లా మ్రోగుతున్నపుడు
పదాల్ని ఇటుకలుగా పేర్చి
నీవొక గుడిని కట్టుకోవాలి

జీవితపు సంతకాలు
ఖాళీ కాగితాల్ని వ్యర్థంగా నింపుతున్నపుడు
గంభీర గ్రంధాల తలుపుల్ని
నీలోనే వెతుక్కోవాలి

సముద్రంలో కలిసిపోయే జీవనది
చివరి మలుపు దగ్గర తిరిగి చూసినపుడు
నదికార్చే చివరి కన్నీరు
నీలో ఇంకో నదిని పుట్టించాలి

గుండెలనుండి ఒలికి పోయే సిరా
పదాలుగా పరుచుకున్నపుడు
కాగితం మీద వ్యక్తమయ్యే వ్యక్తిత్వం
నీ కవితా అద్దంలో అలంకరించుకోవాలి

నిన్ను వింటూ నీతో మాట్లాడే కవిత
ఒక జీవంగా నీలో ప్రవహించినపుడు
నీ వెనుక నీవే దాచుకోకుండా
నీతో నీవే గెలవడానికి రాసుకోవాలి.

17/4/15