ll శిల్పం ll

విరించి  ll శిల్పం ll
.............................
చేతులూ కాళ్లూ విరిచేసి
అందమైన ముఖాన్ని
నిర్దాక్షిణ్యంగా కూల్చేశాక
ఇది ఒట్టి శిల అంటావేం..?
కాదు కాదు ఇది శిల కాదు
ఒకప్పటి సుందర శిల్పం

తన బరువు గుండెనెపుడూ
మోసుకోలేని ఓ బలహీన శిల్పం
చూసే కళ్ళ లోనే తన గుండెని వినిపిస్తుంది
మెదడు మూలుగలో
ఒక మూలకి ఒదిగిన జ్ఞాపకంలా
కొంత రక్తాన్ని శ్వాసిస్తుంది.

పోయం ని చీల్చి చెండాడాలనుకునే
కుటిల విమర్శకుడయినా
ఒకటికి పది సార్లు పోయం చదువుకుంటాడు
కవితా శిల్పం రాళ్ళల్లో పుట్టుకొచ్చేటపుడు
బట్టలు కట్టలేదని అమాంతంగా కూల్చేస్తావా?

నా తలలోంచి ఒక చెట్టు మొలవొచ్చిపుడు
నీ కళ్ల లోగిలి లో దాని విత్తును చూస్తున్నానిపుడు

శిలలోంచి శిల్పం వొలిచేశాక
కాగితాలెక్కితే  సరిపోదిపుడు
నాలికలెక్కాలింక నేనిపుడు

8/2/16