ll Death of The Author ll

విరించి ll Death of The Author ll
-----------------------------------------------------
"A text unity lies not in its origin but in its destination"
                                                                -Roland Barthes

ఎందుకనో
భలే తొందర పడిపోయావు!

పండు వెన్నెల కాగితం మీదికి విసురుగా
సిరా చుక్కల్ని విసిరేస్తావు చూడు
ఏం సరిపోలేదా..
నక్షత్ర మెరుపుల కోసమా
అఘమేఘాల మీద ఈ పయనం?

నీ మనసంతా నిండిన పాటను ఒడుపుగా
ఓ పిట్టలా ఎగరేస్తావు చూడు
ఏం సరిపోలేదా..
పంచ ప్రాణాలు పోద్దామనా
అకస్మాత్తుగా ఈ వాయు సంలీనం ?

మరణానంతర జీవితాన్ని
ఏం ఎందుకని నమ్మవునీవు..?
అభూత కల్పనలని కొట్టివేశావే..
మా గుండెల్లోకి వచ్చి చూసే
'దమ్ము' నీకెక్కడుంది?.

నీ ఆర్కెస్ట్రా ఆపేశావు సరే..
'మ్యూజిక్ డైస్' అనుకున్నావు సరే..
ఏ బాత్ రూం సింగర్ని నీవాపగలవు?
చెవుల పక్క నీ మ్యూజిక్ మోతని
నోటితో హమ్మింగ్ చేస్తే నీవేం చేయగలవు?

నీ మలి సంధ్య నీడ తూ ర్పుకు సాగీ సాగీ
ముని మాపు చీకట్లను తాకి తెల్లారి పోనీగాక
ఈ సాగర సంగమం మాత్రం
మా మనసుల్లోనే జరగాలి.
నీ కవిత్వపు కాపీ రైటు హక్కుల్ని
మా మనసుల్లోనే పూడ్చి పెట్టాలి
పదాల్లోకి ఒలికి౦చిన నీ సంగీతం
జనపదం గజ్జలై మ్రోగాలి

21/2/16
అరుణ్ సాగర్ గారి మీద ఒకింత కాదు
చాలానే ఒచ్చింది కోపం.