విరించి ll   పంట  ll
--------------------------------

హృదయపు అంచులు తాకేలా
చెవులు రిక్కరించి విను
నాకు తెలిసిన ఓ విషయం నీతో చెప్పాలి

అక్షరాలు పండే నేలమీద
చల్లగ పాకే వానపాములాంటోణ్ణి
మబ్బులు ముసిరినపుడైనా నీకు తెలియాల్సింది
ఈ పంట నాశనం కాబోతోందని
పంట, డాబా మీద ఆరేసిన ఉతికిన బట్టలు కాదు కదా?

నీవు నీరు పోస్తున్న విత్తనం ఏ చెట్టవుతుందో
పండ్లు కాస్తేగానీ తెలియక పోవటం
వేస్తున్న ఎరువెటుపోతుందో
కలుపు మొక్కలు పెరిగితెకానీ ఎరగకపోవటం
నిజంగా ఎంతటి విషాదం కదూ
మంచి వ్యవసాయానికి ఎన్ని అంశాలు అనుకూలించాలో

ఇపుడంతా తడిగా ఉంది కదూ..!
కొట్టుకు పోతున్న కలుపు మొక్కలు నేలని వెక్కిరిస్తున్నాయి కదూ..!
రోజులికపై అసంపూర్ణంగా మిగిలిపోతే యేమి?
జీవిత సత్యం బోధపడినట్టే అయింది కదూ..!

ఒయాసిస్సు నీళ్ల కు సైతం పెరిగే చెట్టు ఇది
ఎరుక ఎరువులుంటే చాలు కోతకొచ్చేసే పంట ఇది

 *       *       *
స్నేహం స్నానం లాంటిది
మనల్ని మరింత శుభ్ర పరచాలి

స్నేహం ఆత్మకు ఇల్లులాంటిది
గోడల్లాంటి చేతుల మధ్య వెలుగనివ్వాలి

స్నేహం చిమ్మ చీకటిలో దూరంగా వెలిగే దీపంవంటిది
నడవలేనంతటి దూరం బతుకంతటి ఆశగా మారాలి.

14/8/16