విరించి ll సాల్ సాల్ తీయ్ ll
..............................
తవ్వితే అది సింగరేణి ఊట
పాడితే అది పచ్చి బాలింత పాట
విప్పితే అది బంగారు మూట
అదంతా..
మూర్ఛనలు పోతున్న రుద్రవీణ

అన్నా..కులీ కుతుబ్ షా!!
నీ దిగులిక్కడ మూసీలా పారుతోంది
అవున్నిజం..
అడుగంటిన ఎండ
నిండుకున్న వాన
చెమ్మగిల్లిన సాయంత్రం
సూదులుగుచ్చే ఉషోదయం
నెర్రలీనిన నేలమీద
చచ్చిపోయిన ఓ వెచ్చని కల
దబ్బనాలు గుచ్చుకున్న నాలిక కథ మాది.
ముక్కుమూసుకుంటే ఓ తపస్వి
కళ్లు మూసుకుంటే ఓ కళా రవీ పవీ

ప్రశ్నను చూశావా?
కొడవలిలా కనిపిస్తోంది కదూ..!
దాచి పెట్టుకో తమ్ముడా..పంటకోతకు పనికొస్తుంది.
కాంతెందుకు అబద్దం చెప్పదనుకుంటావో..
నీ నీడ పొడవే సాక్షం.
రెండు సంవత్సరాల ఉదయం కదరా ఇది..!
నీ కాలికింద నక్కి కూచున్న నీడెవరిదని?

అది ఏడుపేనా
చెఱువుకు గండి పడినట్లు?.
మనదంతా
ఎడతెరిపిలేని వానంత నిద్ర కదరా..!
ఉన్న అన్ని భయాలూ మేల్కొంటే...
కనికరం లేని పగలు
సగం భయాలు మేల్కొంటే...
రాత్రి నిద్దురలో కల
ఉరుముల పిడుగుల కల
రాత్రీ పగలుల నిద్ర.
గడియారం ముల్లు గుచ్చుకున్న గాయం.

దండలేసుడు దండాలు పెట్టుడు
ఇంటి మూలల మీద పునాదులిప్పుడు
యజ్ఞాల్జేసుడు..
అతికారం మీద తీపి పూత పూసుడు
సాల్ సాల్ తీయ్..!
నమ్మకమీనేల మీదుంది గదా..
రిలయెన్సెందుకు తీయ్.

7/12/16