Bahubali - a view
................................
బాహుబలి బలమంతా ఇంటర్వల్ తరువాత వచ్చే యుద్ధం సీన్ లో ఉంది. అదొక అద్భుత చిత్రీకరణ. కొన్ని హాలీవుడ్ సినిమాల సీన్స్ ని కాపీ కొట్టారని చాలా మంది చెబుతూనే ఉన్నారు. అయినాకానీ ఇంత భారీ యుద్ధ సీన్ ని క్షణం కూడా బోర్ కొట్టించకుండా తెలుగు ప్రజలకు అందించటం, నిజంగా హర్షణీయం.

నెగేటివ్ టాక్ ఎలా ఉన్నా, ఈ ప్రయత్నాన్ని స్వాగతించాలి. నేల విడిచి సాము చేసినట్టుగా లాజిక్ కి అందని కొన్ని సీన్స్ ఉన్నాయి. వంద సార్లు కొండమీంచి కిందపడ్డా కనీసం నడ్డి విరుగని శివుడు, శివ లింగాన్ని ఎత్తుకుని నదిలోకి బొక్క బోర్లా పడినా మునిగి పోని శివుడు, తమన్నా నది ఒడ్డున నిద్రపోయినపుడు అరచేయి వరకు నీటిలో మునిగినట్టు కనిపించినా, నీటిలో ఉండే కెమెరా లో మాత్రం, మోచేయి వరకు మునిగినట్టు చూపటం, రాయి పైపొరని చేతితో వొలిచేయటం, అది సరిగ్గా పడవలాగా బయటకి ఊడిరావటం, మంచుతుఫానులో ఇద్దరూ ఆ పడవలాంటి దానిలో జారుతూ పోతున్నపుడు, ఒక చోట ప్రభాస్ పడవలోంచి ఎగిరి పడిపోయిన సమయంలో, పడవలో ఉండాల్సిన తమన్నా ఉండకపోవటం, కొండ మీద లోకంలో అక్కడే నదీ తీరం, అక్కడే మంచు కొండలు, అక్కడే మంచు తుఫాన్లు రావటం, వంద మంది తాల్లతో లాగినా లేవని పడిపోయే విగ్రహాన్ని ఒకే ఒక్కడు తాడేసి లాగగానే లేవటం, కట్టప్పలాగా ముసలి వాడిగా ఉండాల్సిన భల్లాలకి కనీసం ఒక వెంట్రుక కూడా నెరవక పోవటం మున్నగునవి.

దున్నపోతు అసలు దున్నపోతులా కనిపించకపోవటంతో అద్భుతంగా ఉండాల్సిన సీన్ కాస్తా తేలిపోయింది. కొన్ని చోట్ల చెప్పిన డైలాగ్స్ లో కనీసం ఉండాల్సిన మాడ్యులేషన్ లేక పోవటంతో రాసిచ్చిన మాటల్ని అప్పజెపుతున్నట్టుగా అనిపించింది. ఈ విషయంలో శ్రీ రామదాసు, శిరిడీ సాయి వంటి సినిమాలకంటే చాలా బెటర్. తమన్నా కత్తి యుద్దం తేలిపోయింది. హాలీవుడ్ లో హీరోయిన్స్ ఫైట్స్ చూసాక ఇది మరీ పేలవంగా అనిపిస్తుంది. అక్కడ ఫిమేల్ కారాక్టర్ కదా అని పెద్దగా పట్టించుకున్నట్లు కనిపించదు. ప్రభాస్ కి, తమన్నాకీ మధ్య ఉండే అడల్ట్ సీన్స్ అసలు అవసరమే లేదు. అది లేకున్నా స్టోరీలో పెద్ద మార్పేమీ ఉండదు. విదేశీ పడుచులతో ప్రభాస్ పాటలో కూడా అంత వల్గారిటీ ఉండాల్సిన అవసరం లేదు. చిన్న పిల్లలు కూడా చూస్తారు కాబట్టి కాస్త హుందాగా ప్రభాస్ పాత్రని మలచి వుండాల్సిందనిపిస్తుంది. అందునా ఆ పాత్ర బాహుబలిది కాబట్టి.

గూడెంలో ఒకడిగా కనిపించే తనికెల్ల భరణి మరల ఎక్కడా కనిపించడు. బాహుబలి కి గానీ, భల్లాల తండ్రి పాత్ర వేసిన నాజర్ కి కానీ లేని జంధ్యం, భల్లాలకి ఉంటుంది. అదికూడా బుల్ ఫైట్ సీన్ లో మాత్రమే. బుల్ ఫైట్ కి ముందు జంధ్యాన్ని తీసేస్తున్నట్టు చూపించి, ఆ తరువాత అక్కడే కట్టప్ప తో జరిగే సంభాషణలో వేయబడి ఉంటుంది. మరలా సినిమాలో ఎక్కడా కనిపించదు. అది కూడా ఒక తాడంత మందంగా ఉంటుంది. కాలకేయుడే కాక ఆ సైన్యం మొత్తం నల్లగా ఎందుకుంటారో తెలియదు. ఇలాంటి సీన్స్ కల్చర్ ని సరిగా స్టడీ చేయవలసిన అవసరాన్ని చెబుతాయి. పాటలు పరవాలేదు. బ్యాక్ గ్రౌండ్ స్కోర్ అద్భుతః. యుద్ధం సీన్స్ లో అదరగొట్టే స్కోర్స్ ఉన్నాయి. మొత్తానికి ఇంటర్వెల్ వరకూ ఓకే లా ఉన్నా, ఇంటర్వెల్ తరువాత స్టోరీ గ్రిప్పింగ్ గా ఉంది. వెంట్రుకలు నిక్కబొడుచుకుంటాయి. ప్రభాస్ యాక్షన్ బాగుంది. భల్లాల పాత్రలో పట్టు కనిపించదు. ఒక సాఫ్ట్ విలన్ గానే ఎష్టాబ్లిష్ చేశారు. కాలకేయుడులో ఉండే విలనిజం కూడా భల్లాల పాత్రలో లేదు. కేవలం అసూయ, అమాయకత్వం, తండ్రి ఏది చెబితే అది. దుర్యోధనుడిలా అవిటి తండ్రిని పక్కన కూర్చో పెట్టినట్టు కూడా కనిపించదు. మహా భారతం ఛాయలు చాలానే ఉన్నాయి.

నిజానికి సినిమాని సడన్ గా ఆపేసినట్టు అనిపించినా, ప్రేక్షకుడు సాటిస్ఫై అవుతాడు. రెండవ భాగం కోసం తప్పక వెయిట్ చేస్తుంటాడు.