విరించి ll సాధన ll
.............................................. ...
జీవితం కోల్పోయిన సునిశితమైన అనుభవాల్ని
తిరిగి పొందాలంటే..
ముందుగా మనమందరం
జంతువుల్ని ప్రేమించటం నేర్చుకోవాలి.

కలుషితమనే పదం తెలియని స్నేహాన్ని
అనేక భావాల్ని ఒకేసారి వ్యక్త పరిచే మౌనాన్ని
నీవపుడే మొట్టమొదటి సారి కనుగోవచ్చేమో..

ఒక జంతువుతో నీవు ఆకర్షింపబడటానికి
నీలో మానవాతీత శక్తి ఏదో దాగుండాలి
మెదడులో పండితుడవనే గర్వాన్ని
నాలుక మీద తారాడే గ్రాంధిక భాషనీ
జంతువే కదాని చూసే చిన్న చూపుని
డిగ్రీలని, డబ్బునీ, పదవులనీ అన్నిటినీ వదిలేసి..
నిర్మలమైన మనసుతో దానిని చేరితేనే
అది నిన్ను దగ్గరికి రానిస్తుంది.

చిన్నగా ఉన్న జంతువుని పెంచి పెద్ద చేయటం
అంత సులువైన పనేమీ కాదు..
ఆరోగ్య కరమైన వాతావరణంలోనే
దానిని ఎదగనివ్వాలి.
అనవసరంగా క్రూరంగా పెరిగే గోళ్ళని
ఎప్పటికప్పుడు కత్తిరించాలి.
రోజూ ఆఫీసు నుండి వచ్చాక
కాసేపు దానితో గడపాలి
దాని మాటల్ని శ్రద్ధగా వినడం
నిత్యం సాధన చేయాలి.

జంతువు పెరిగి పెద్దదవుతున్న కొలదీ
నీకది అలవాటుగా మారుతున్న కొలదీ
నీతో అది మాట్లాడటం మొదలవుతుంది.
నీ గొంతునే అది వినిపిస్తుంది.
ఒక్కో సారి నీతో అది అబేధాన్ని ప్రకటిస్తుంది.

నేనీ మధ్యే కొన్ని జంతువుల్ని పెంచుతూ
జీవితపు ఆనందాల్ని చవిచూస్తున్నాను.
నాలుగు పాదాలతో సాగే ప్రతీ పద్యమూ
ఒక జంతువే కదా...

10/9/15