విరించి  ll ఒక్క రోజు సెలవు.ll
..............................
హృదయాల మీద లిఖించగలిగే నాలిక అది
కలల్ని వర్షించే కన్నులవి
జ్ఞానాన్ని పసితనంగా అందించే నవ్వులవి
భవిష్యత్తుతో స్నేహించే చేతులవి
మనిషిని సమున్నతంగా నిలిపే పాదాలవి.

ఎందుకో ..ఈరోజొక సెలవు కోరింది.
అలసట తీర్చుకోవటానికి కాదు,
రేపటి రోజున మరో చరిత్రై పుట్టేటందుకొక సెలవడిగింది.
రగిలించిన మెదడుకి ప్రాణంతో పని ఏమని ప్రశ్నిస్తూ..
ఈ ఒక్క రోజుకి కాస్త సెలవడిగింది.

ఈ సాయంత్రం ఒకచుక్క నేలరాలితే..
ఈ దేశపు ఆకాశం కన్నీటి చుక్కల్ని మోసింది.
నడిచే గ్రంథాలయం మూసుకుపోయింది.
కలల కర్మాగారం మూతపడింది.
చరిత్ర పుస్తకం అశ్రు నయనాలతో ఆహ్వానించింది.

ఒక ఆలోచన తన స్వేచ్ఛను ప్రకటించుకుంది.
అగ్ని రెక్కలతో నింగికెగసింది.
అజ్ఞానానికి అందని ఆత్మ నంటూ
తన ప్రయాణం నింగి వైపంటూ
మిసైల్లా దూసుకుపోయింది.

ఆచరణలో ఈ స్వప్నం ఒక మిసైల్ మాత్రమే
మనిషిగా ఆయనొక మెసైయ్య.

(మహనీయుడు, చివరి క్షణం వరకు జ్ఞానాన్నే శ్వాసించిన వాడు, నిరంతర స్పూర్తి ప్రదాత, శాస్త్రవేత్త
మాజీ రాష్ట్రపతి శ్రీ అబ్దుల్ కలాం పాదాలకి అశ్రు నివాళి.)