విరించి ll అడవి చెట్లు ll
..............................
అడవి చెట్లన్నీ
ఆకుపచ్చగానే పుట్టి పెరుగుతాయి
ఎర్రెర్రటి పూలే విరగబూస్తాయి
ఆకుల్ని జెండాల్లా ఎగిరేస్తాయి
కొమ్మల్ని తుపాకుల్లాగా చాస్తాయి
అంతాకలిసి,
ఒక్క సూర్యోదయాన్నే కలగంటాయి

అడవి చెట్ల మీద
కోయిలలు పాటలు కడతాయి
వసంతం నుండి శిశిరం దాకా అవి
చెట్ల భాషే వినిపిస్తాయి
ఆ చెట్ల మీదే అవి గూళ్ళు కడతాయి
అంతా కలిసి,
ఒక్క సూర్యుడినే ముక్కుతో కొరుక్కుతింటాయి.

అడవిలో చెట్లెందుకని అడిగాడు వాడు
లోకంలో పచ్చదనం కోసమన్నాయవి
అడవిలో వుండి ప్రయోజనమేమన్నాడు వాడు
వర్షాలకోసమన్నాయవి
నగరంలో వుంటే నీడుండేదన్నాడు వాడు
అక్కడంతా కాలుష్యమన్నాయవి
అడవి పూలెందుకన్నాడు వాడు
కొమ్మలు, ఆకులెందుకన్నాడు
చెట్లన్నీ కూలుస్తానన్నాడు
అడవుల్ని కాలుస్తానన్నాడు వాడు
*       *       *       *       *
అడవిలో రాళ్లు శ్వాసిస్తున్నాయిపుడు
కోయిలలన్నీ పైకెగిరాయిపుడు
పక్షి కంటికన్నీ కనిపిస్తాయి,
వాటికి
అడవీ తెలుసు, నగరమూ తెలుసు

26/10/16