ఇవాళ పొద్దున ఒక ఫోన్ వచ్చింది. ఓం నమో వేంకటేశాయ అని ఒకాయన పలకరింపు.
పలకరింపులోనే నేనో డాక్టర్నని తెలుసుకోగలగటం ఆయనకో టెక్నిక్.
ఆయనొచ్చేసి, తిరుమల తిరుపతి దేవస్థానం ప్రధాన అర్చకుడని చెప్పుకున్నాడు. ప్రస్తుతం తిరుమల నుండి మాట్లాడుతున్నాడట. నా నెంబరు అష్టలక్ష్మీ దేవాలయ అర్చకుడు ఆయనకు ఇచ్చాడట. అంత పెద్దవారు ఈ అల్పజీవికి ఎందుకు చేశారబ్బా అని అనుకుంటుండగానే..
తిరుమల నుండి హైదరాబాదుకు ఒక దైవకార్యం మీద ఒచ్చిన నలుగురు బ్రాహ్మణులు పయనించే కారు, హైదరాబాదు ఎల్.బీ నగర్లో ఆగిపోయిందట. రిపేరు చేయటానికి చాలా ఆలస్యమవుతుందట. కాబట్టి మీరు వారికి సహాయం చేయగలరా అని ఒక అభ్యర్థన. మనిషేమో పెద్దాయన, పైగా వేంకటేశ్వరుడి ప్రధాన అర్చకుడు, ఇదేదో ఆ వేంకటేశ్వరుడి కృపా కటాక్షాలేమో, ఇటువంటివారికి సహాయం చేయాల్సి రావటం అనుకున్నా. ఏదో "ఇక్కడ సహాయం చేయబడును" అని బోర్డు పెట్టుకున్న వాడిలా కాసేపు తెగ ఇదై పోయాననుకోండి.
పైగా త్వరలో తిరుమల ప్రోగ్రాం ఉంది, ఈ లెక్కన స్వామివారి కాళ్ళని అతి దగ్గరనుంచి గాఠిగా పట్టేసుకోవచ్చేమో అని ఒక వెర్రి ఆవేశం. అంటే ఇపుడు సహాయం అందించి ఆ తరువాత దర్శన సమయంలో సహాయం పుచ్చుకోవచ్చన్నమాట. ఆగండి ఆగండి..మరీ ఇంత దారుణమా అని అనకండి. ఏదో స్వామి మీద భక్తి నాతో అలా ఆలోచింపజేసి ఉంటుంది. ఇంకా నేను చాలా నయ్యం, రెండు లడ్లు ఎక్కువ వేసుకుని రావచ్చని ఆలోచించలేదు సుమా...!! అందుకే నేను కొద్దిగా మంచోణ్ణి అంటే నమ్మండి.
ఇహ, విషయానికొస్తే...దేవస్థానం బ్రాహ్మణులు కదా, బయట తినరు కదా ఇంటికి తీసుకెల్లి సుష్ఠుగా భోజనం చేయించమంటాడేమో అనుకున్నా...ఈ లోగా ఆయన ఇంకో వెహికిల్ ఏర్పాటు చేసుకుంటాడేమో అనుకున్నా. మాట్లాడుతున్న ఇంత సమయంలోనే ఇలా పలువిధాలుగా ఎలా ఆలోచించాననుకుంటున్నారా?. నిన్ననే మోకాలికి పాదరసంతో మర్ధన చేశానులేండి. కానీ నేను అనుకున్నది కాదట. వారికి బస్సు టికెట్టు ఇప్పించి తిరుపతి బస్సు ఎక్కించాలట, వారి దగ్గర డబ్బులు లేవట. ఇపుడు వారి వాహనం ఎల్.బీ. నగర్ లో ఆగి ఉందనీ, అక్కడికెళ్లి ఏమైనా డబ్బు ఏర్పాట్లు చేయగలరా అని అభ్యర్థన.

ఆ సమయంలో నేను హాస్పిటల్ లో ఉన్నాను. ఎల్ బీ నగర్ కి సరిగ్గా ముప్పై కిలో మీటర్ల దూరంలో. నా చేయి అక్కడి దాకా చాపలేనని అర్థం అయ్యి, వెంటనే నాన్న కి ఫోన్ చేశాను. మ్యాటర్ చెప్పాను. పాపం నాన్న అప్పటికప్పుడు తయారై రయ్యిమని ఎల్.బీ. నగర్ లో వాలాడు. ఇక సినిమా అప్పుడు మొదలైంది. ఆయన నెంబరుకు నాన్న ఫోన్ చేసి, "వాళ్ళెక్కడున్నారు సర్" అని అడిగితే, ఒక సారి ఫలానా బేకరీ దెగ్గర అని, ఇంకో సారీ ఫలానా మసీదు దగ్గర అనీ అర్థం పర్థం లేని జవాబులు. ఆ తరువాత ఆయన 'ఆ బ్రాహ్మణులవి' అని రెండు నంబర్లివ్వటం,  వాటికి నాన్న ఫోన్ చేయటం, అవి స్విఛాఫ్ అని రావటం, మరలా ఆయనకు చేస్తే, "ఛార్జింగ్ అయిపోయి ఉండవచ్చండీ..!"  అని చెప్పటమూ చాలా నాటకీయంగా జరిగి ఉంటాయని మీకు ఈ పాటికి అర్థం అయి వుంటుంది. అపుడు ఆ మహానుభావుడు, " డ్రైవరు అకౌంట్ నంబరిస్తాను ఒక ఐదు వేలు ట్రాన్స్ఫర్ చేయండి" అని అడగ్గానే,  సినిమా క్లైమాక్స్ ముందే అర్థం అయ్యి చిరాకుగా లేచొచ్చే సగటు ప్రేక్షకుడి అవతారం వెనువెంటనే ఎత్తి కారు వెనక్కి తిప్పాడు నాన్న.

కాసేపయ్యాక నేను , ఏదేదో ఊహించుకునే అల్ప సంతోషయినటువంటి ఈ సదరు 'నేను' అనేవాణ్ణి, ఎంతో ఉత్సాహంగా, ఉల్లాసంగా నాన్నకి ఫోన్ చేశా ఏమయ్యిందని. 'ఒరేయ్ తింగరోడా' అని అనకున్నా ఆల్మోస్ట్ అలాగే మాట్లాడి, "ఇంటికి రారా నీ పని చెప్తా" అని పెట్టేశాడు. ఇంతలో నాన్న తెలివి గమనించిన ఆ మహానుభావుడు, ఇక లాభం లేదనుకుని నన్ను బుట్టలో వేసెయ్యొచ్చనుకున్నాడేమో.. నాకు ఫోన్ చేసి "మీ నాన్న గారు కనుక్కోలేకున్నాడు నాన్నా వారిని, ఊరికే అందరికీ ఇబ్బందులెందుకు, నేనో అకౌంట్ నంబరు చెబుతా దానిలో ఓ ఐదువేలు వేసేయవా?" అన్నాడు. థోత్ ...జీవితం. నా నోటిలో ఓ నాలికుందనీ, దానికీ వీరావేశం వస్తే దబిడి దిబిడేనని అప్పుడే నాకూ అర్థం అయ్యింది. Dont trouble the trouble, if you trouble the trouble, trouble troubles you అన్నంత పని చేసాను. అయ్యవారు ఉడుక్కుని ఫోన్ పెట్టేశాడు. ఇదిగో ఇదే ఆ నెంబరు 7337535758. కోపం వచ్చిన వారు కోపంగానూ, నవ్వొచ్చిన వారు నవ్వుకుంటూ అపుడపుడూ సారును ఆడుకోండి. దేవుడి పేరుతో జరిగే మోసాల్ని చూసినపుడల్లా సారునో సూపు చూస్తూ ఉండండి. ఇక్కడ నా పని మా నాన్న చూసుకుంటాడులెండి!!.

గమనిక- తిరుమల నుండో..యాదగిరి గుట్టనుండో అర్చకులమని ఇలా అబద్దాలు చెప్పి మోసాలు చేసే వారు పెరిగిపోయారు. వీళ్ళు అర్చకులు కాదు. పెద్ద వారి పేరుని ఇలా వాడేసుకుని మోసాలు చేస్తున్నారు.
పోలీస్ లకు ఇటువంటి మోసాగాళ్ల సమాచారం వెంటనే ఇవ్వగలరు