విరించి ll నీ కవిత ll
......................................
మురుగు కాలువ నుండి
సెలయేటి దాకా సాగిన నీ కవిత
ఇక పై జలపాతంలా దూకాల్సి ఉంటుంది

సుదూర భవిష్యత్తనే మిష నుంచి
సమీప గతమనే మిథ్య నుంచి
వేగంగానే విడివడి
ఈ శూన్య వర్తమానాల్నే నింపాల్సి ఉంటుంది

అవ్యక్తంగా దాగున్న పరాయి మనిషిని
నీ లోతుల్లోకి తోసేసి
నిన్ను  నీవే ఆక్రమించుకోవాల్సి ఉంటుంది.

నగ్నంగా అలంకరించుకునే భావాలకే కదా
ఈ భాష అద్దంలా నిలబడేది...
అందుకే నీ మనసుకు నీవే
వలువలు విప్పుకోవాల్సి ఉంటుంది.

మనిషిగా మిగిలిన ఒక ఆకారం కోసమే కదా
ఈ ప్రపంచం ఎదురు చూసేది....
అందుకే మనమందరం కలవటం కోసమే
కవితలు రాసుకోవాల్సి ఉంటుంది.

20/3/15

(మనమందరం కలవటం కోసమే...ఒకరికొకరం తెలుసుకోవటం కోసమే ఈ కవిసంగమం అని యాకూబ్ గారు అన్న మాటల స్పూర్తితో)
Best Wishes For World Poetry Day