విరించి ll కిటికీ ll
..................................
ఈ పుస్తకం అల్మారాల్లో
దాచుకోవల్సిందేమీ కాదు
ప్రతి పేజీని ముక్కలుగా చింపి
ఒక మనిషినైనా చేయాల్సింది.

ఈ పంజరమేమీ చకోర పక్షికోసం
ఎదురుచూడటం లేదు
రాలిన కొన్ని కాకీకలను పేర్చి
ఒక నెమలికన్నుతోనైనా ఎగరాల్సింది

ఈ నాలుగు బజార్ల కూడలిలో..
తార్రోడ్డసలు ఏ రస్తాకూ లేదు
మన్నులో మునిగిన ఇనుప విత్తనాలు
ఒక మినుప చెట్టుగా నైనా తేలాల్సింది

ఈ ఊదేసిన సిగరెట్ డబ్బాలో
పునర్జెన్మనెత్తే జీవితాలేవీ లేవు
ప్రాణభిక్షతో బ్రతికిన సిగరెట్ బట్ లు
ఒక దీపాన్నైనా వెలిగించాల్సింది

ఈ జ్ఞాపకాలేవీ చదివి పడేసిన
అజ్ఞాత కరపత్రాలు కావు
తుఫానుతోపాటు గాలికి ఎగిరి
ఒక కాగితం పడవగా నైనా ఆడాల్సింది

ఈ రాల్చేసిన జీవితమేమీ
జ్ఞాపకాల శవయాత్ర కాదు
వైరాగ్యాన్ని తోడుగపంపే శ్మశానానికి
ఒక కిటికీగానైనా మారాల్సింది.

23/1/15