విరించి ll పిడికిలి ll
..................................
పిడికిలి అంటేనే మూసి వుంచేది.
ఎత్తి పట్టినా, జై కొట్టినా
దాని స్వార్థాలు దాక్కునే వుంటాయి

శత్రు విజయాలకన్నా మిత్ర విజయాల్ని 
లెక్కపెడుతూ 
ఉత్సాహాల్ని తాగి ఉరకలెత్తే ప్రతివాడూ
గుంపుని పోగేసుకునేది
ఒక తలలేని గుండెకోసమే.

నీలో ఉరిమే ఉరుములకి
మురిసిపోయేవాడెపుడూ
నీ కడుపులోనే అగ్గి పెడుతుంటాడు
నీ ఖాళీ కడుపులో వాడికొక 
వెలిగే దారి కనుక్కొంటాడు

ఒక దండవేసి రెండు స్తోత్రాలు
గట్టిగా చదివినంత మాత్రానికే
భ్రమలో పదిమందిని వెనకేసుకు నిల్చుంటావు
నీ వెనుకనున్న వాడి ధీమా నీకుంటుందా చెప్పు?

నీ ఆవేశమూ నీ ఆకలీ
ఒక ఉదయాన్ని రగిలించడానికే తప్ప
నీ ఉదయాన్ని వెలిగించటానికి కాదు

వెలుగొక రోజుగా ఉదయించే సమయానికి
వెనుక వరసలు ముందుకు మారుతుంటాయి
చివరి వరుసకి మారిన నీ ఆవేశం, నీ ఆకలి వెనుక
ఎప్పటిలా ఒక అగాధమే నిలబడివుంటుంది.

24/4/15